काठमाडौ : भारतको ओडिसा राज्य प्रहरीले केआइआइटी विश्वविद्यालयमा नेपाली विद्यार्थीमाथि भएको दुर्व्यवहार तथा नेपाली छात्रा प्रकृति लम्सालको मृत्युबारे अनुसन्धान गर्न एकजना महानिर्देशक, दुई निर्देशक र दुईजना सुरक्षा गार्ड गरी पाँचजनालाई मंगलवार साँझ पक्राउ गरेको छ।
मानव श्रोत हेर्ने महानिर्देशक शिवानन्द मिश्र, प्रशासन निर्देशक प्रतापकुमार चमुपति र छात्राबास हेर्ने निर्देशक सुधिर रथ पक्राउ परेका हुन्। प्रहरीलाई उद्धृत गर्दै ओडिसा टेलिभिजनले यो समाचार प्रशारण गरेको छ।
यसअघि प्रहरीले दुईजना सुरक्षागार्ड रमाकान्त नायक र जोगेन्द्र बेहरालाई पक्राउ गरिसकेको छ। आत्महत्या दुरुत्साहन मुद्दामा विश्वविद्यालयका विद्यार्थी अद्विक श्रीवास्तबलाई सोमवारै पक्राउ गरेर अनुसन्धान थालिसकेको छ। राज्य सरकारले मंगलवारै घटनाबारे छानविन गर्न उच्चस्तरीय जाँचबुझ समिति गठन गरिसकेको छ।