अत्तरियाः राष्ट्रिय दलित पत्रकार संघ सुदूरपश्चिम प्रदेशका अध्यक्ष तथा नेपाल पत्रकार महासंघ कैलाली शाखाका साधारण सदस्य हिमेश बि.क. माथि पितृशोक परेको छ । उनका पिता, दलित आन्दोलनका अग्रज व्यक्तित्व, राष्ट्रिय दलित आयोगका पूर्व सदस्य तथा चर्चित कृति ‘शिल्पी समुदायको इतिहास’का लेखक दानबहादुर विश्वकर्माको निधन भएको छ ।
स्वर्गीय विश्वकर्माले लामो समयदेखि दलित समुदायको अधिकार, सामाजिक न्याय, समानता तथा समावेशी समाज निर्माणका लागि निरन्तर संघर्ष गर्दै महत्वपूर्ण योगदान पुर्याएका थिए । राष्ट्रिय दलित आयोगको पूर्व सदस्यका रूपमा उनले नीति निर्माण र दलित अधिकारको संस्थागत विकासमा सक्रिय भूमिका निर्वाह गरेका थिए।
उनको चर्चित पुस्तक ‘शिल्पी समुदायको इतिहास’ दलित समुदायको इतिहास, पहिचान र योगदानलाई दस्तावेजीकरण गर्ने महत्वपूर्ण सन्दर्भ सामग्रीका रूपमा स्थापित छ । उनका विचार, लेखन र सामाजिक अभियानले दलित आन्दोलनलाई सशक्त बनाउन उल्लेखनीय भूमिका खेलेको मानिन्छ ।
सादगीपूर्ण जीवनशैली, स्पष्ट विचार र समाजप्रतिको समर्पणका कारण विश्वकर्मा सबै वर्ग र समुदायमा सम्मानित व्यक्तित्वका रूपमा परिचित थिए । उनको निधनप्रति विभिन्न राजनीतिक दल, सामाजिक संघसंस्था, नागरिक अगुवा तथा अधिकारकर्मीहरूले गहिरो दुःख व्यक्त गर्दै श्रद्धाञ्जली अर्पण गरेका छन् ।
उनको निधनसँगै नेपाली दलित आन्दोलनले एक अनुभवी, अध्ययनशील र समर्पित अभियन्ता गुमाएको टिप्पणी गरिएको छ। यस दुःखद घडीमा पत्रकार हिमेश बि.क.सहित सम्पूर्ण शोकाकुल परिवारजनप्रति हार्दिक समवेदना व्यक्त गरिएको छ ।
