कञ्चनपुर : नेपाल राष्ट्रिय समाज कल्याण संघ (एनएनएसडब्ल्यूए) ले महाकाली नदी तटीय क्षेत्रका समुदायहरूलाई प्राथमिक उपचार सामाग्री वितरण गरेको छ ।
बुधबार एनएनएसडब्ल्यूएले डीसीए नेपालसँगको साझेदारीमा सञ्चालित सुदृढ परियोजनामार्फत भीमदत्त नगरपालिकाका ११ र दोधारा चाँदनी नगरपालिकाका १४ गरी २५ वटा विपद् व्यवस्थापन समितिलाई नियमित कार्यालय सञ्चालन तथा प्राथमिक उपचार सामग्रीहरू वितरण गरेको हो ।

भीमदत्त नगरपालिकाका मेयर पदम बोगटीले भीमदत्तका ११ वटा विपद् व्यवस्थापन समितिलाई सामग्री हस्तान्तरण गरे भने दोधारा चाँदनीका निमित्त प्रमुख प्रशासकीय अधिकृत हरिदत्त जोशीले पालिकाका १४ वटै समितिलाई सामग्री वितरण गरे ।
प्रत्येक विपद व्यवस्थापन समितिलाई प्राथमिक उपचारका लागि टिनको बाकस, कटन रोल, कटन गेज, बेन्डेज, बेटाडिन, हेण्ड प्लास्ट, सर्जिकल कैँची, सर्जिकल फोरकेप, मूभ, डेटोल साबुन र नियमित कार्यालय सञ्चालनका लागि माईनट रजिस्टर, बचत रजिस्टर, क्रेडिट रजिस्टर, स्ट्याम्प पेड, पञ्चिङ्ग मेसिन र बल पेन गरी जम्मा ५ हजार ५७ रुपैयाँ बराबरको सामग्री वितरण गरिएको उनले बताए ।
उनले डडेल्धुराको पर्शुराम नगरपालिकाका ५ वटा विपद् व्यवस्थापन समितिलाई पनि प्राथमिक उपचार सामग्री वितरण गरिने बताए । भीमदत्तका मेयर बोगटीले एनएनएसडब्ल्यूएले समुदायमा विपद् व्यवस्थापन, न्युनीकरण तथा प्रतिकार्यका लागि सराहनीय कार्य गरेको भन्दै धन्यवाद व्यक्त गरे ।