धनगढी : कैलाली जिल्ला अदालतको पूर्ण बैठक बसेको छ । बैठकले जेनजी आन्दोलनपछि रोकिएका केही सेवा आजदेखि सुचारु गर्ने निर्णय गरेको छ ।
यसअघि २९ भदौमा पूर्ण बैठक बसेर केही सेवा सुचारु गरिएकोमा दोस्रो बैडकले थप सेवा सञ्चालनको जानकारी दिएको छ । आजदेखि मुद्दा फिर्ता, मिलापत्र र विशेष प्रकृतिका निवेदन अधिकृत वारेसनामा प्रमाणित, दर्ताद्वारा विवाह, मृत्युको न्यायीक घोषणा लगायतका सेवा पनि सुचारु भएको अदालतले सूचना जारी गर्दै जानकारी दिएको छ ।
यसअघि नै बन्दी प्रत्यक्षीकरणको निवेदन दर्ता तथा सुनुवाई, म्याद थप, पक्राउ पूर्जीको अनुमति, जरुरी पक्राउ पर्जीको स्विकृति, कल डिटेल अनुमति र अभियोग पत्रसाथ उपस्थित गराइएका प्रतिवादीहरुको बयान एवं थुनछेकको काम भइरहेको थियो । तत्काल अदालतबाट तारेख गुज्रिएको पटक कायम नहुने तथा म्याद हदम्याद नगुर्जिने पनि सूचनामा उल्लेख छ ।
‘प्रचलित मुलुकी फौजदारी कार्यविधि संहिता, २०७४ को दफा ५९ र मुलुकी देवानी कार्यविधि संहिता, २०७४ को दफा २२५ तथा सर्वोच्च अदालतको बृहत पूर्ण इजलासबाट ०७६ –आरई– ०३९२ को निवेदनमा भएको कानूनी व्याख्या सम्बन्धी आदेश समेतका आधारमा पछि प्रकाशित हुने सूचनाको मितिले बाटोको म्यादबाहेक ३० दिनभित्र यस अदालतमा उपस्थित हुन सक्ने गरी नियमित सेवा सूचार गर्ने सम्बन्धमा अर्को सूचना पछि प्रकाशित गरिने छ,’ सूचनामा उल्लेख छ ।
जेनजी आन्दोलनका क्रममा कैलाली जिल्ला अदालतमा पनि आगजनी, तोडफोड र लुटपाट भएको थियो । अदालतमा ११ करोड बराबरको क्षति भएको जनाइएको छ ।