गोदावरीबाट एमाले प्रतिनिधि छनौटमा प्रकृया विपरित चुनाव भएको भट्ट,सुवेदी समुहको भनाई

अत्तरिया : कैलालीको गोदावरीमा एमाले प्रतिनिधि छनौटमा प्रकृया विपरित चुनाव भएको बताईएको छ । नेकपा एमालेको प्रथम सुदूरपश्चिम अधिवेशनका लागि गोदावरीबाट प्रतिनिधि छनौमा प्रकृया विपरित चुनाव भएको भट्ट,सुवेदी समुहले बताएका छन् । आज (शुक्रबार) पत्रकार सम्मेलनको आयोजना गर्दै भट्ट,सुवेदी समुहले प्रतिनिधि छनौटमा प्रकृया विपरित चुनाव भएको बताएका हुन् ।

पार्टिको हितलाई आधार बनाएर आफुहरुले निर्वाचनमा भाग नलिएको भएपनि अर्कोसमुहले आफुहरुविरुद्ध भ्रम सृजना गर्न मतपरिणाम सार्वजनिक गरेको जिल्ला कमिटी सदस्य आनन्द प्रसाद भट्टको भनाई छ । उनले आफुहरुले चुनावमा भाग नलिनुका पछाडीका कारणहरु स्पष्ट पार्नका लागि पत्रकार सम्मेलन गरिएको बताए । गोदावरीमा नेकपा एमालेका जम्मा १ हजार ४ सय ३८ जना संगठित सदस्य रहेकोमा निर्वाचनमा ५ सय ७७ जनाले मात्रै मतदान गरेको र बाँकी ८ सय ६१ जनाले विधि, पद्धति, जबरजस्ती र एकलौटी ढंगबाट गरिएको निर्वाचनमा भाग नलिएको उनीहरुको भनाई छ । ३९ प्रतिशत मत खसेको तर ६१ प्रतिशत मतदाताले भाग नलिएर सत्यको पक्षमा उभिएका भट्टले बताए । लोकतान्त्रीक प्रकृयाबाट आफुहरु पछाडी हटनुपर्ने केही कारणहरु रहेको समेत उनले उल्लेख गरे ।

चुनावी प्रकृयामार्फत नभई पार्टीका आवश्यकता र पार्टीका शिर्ष नेताहरुको ईच्छालाई महसुस गरेर पार्टी हित अनुसार सर्वसम्मतीमा गोदावरीबाट प्रतिनिधि छनौट गरेर लैजानुपर्ने अडान आफुहरुको रहेको बताउदै उनले चुनावको अघिल्लो दिनसम्म पनि सहमतीको प्रयास असफल हुदाँ चुनावी प्रकृया सुरु गरिएको बताए । ‘पहिलो कुरा त निर्वाचन प्रकृया नै अवैधानिक छ, त्यस्तो अवैधानिक निर्वाचन प्रकृयामा हाम्रो सहभागीता रहने कुरै रहदैन’ एमालेका जिल्ला कमिटि सदस्य भट्टले भने ‘दोस्रो कुरा पार्टीमा सहमती गरेर अगाडी बढ्ने कुरामा ऐक्यवद्धता जनाएर निर्वाचन प्रकृयामा सहभागी नभएका हामीहरुविरुद्ध हाईप्रोफाईल नेता पराजित भएको भन्दै भ्रम सृजना गरिएको छ ।’

उनले आफुहरुले पार्टीभित्रको कुरा बाहिर नल्याउने चाहना राखेपनि अर्काे पक्षले बहादुरीका साथ आफुहरुलाई कमजोर सावित गर्न खोजेकाले पत्रकार सम्मेलन गर्नुपरेको बताए । ‘हामी पार्टी हित र पार्टी निर्माणलाई केन्द्र बिन्दुमा राखेर हिडेका छौै’ उनले भने ‘तर हाम्रा साथीहरुले पार्टी कार्यालयमै पत्रकार बोलाएर पार्टी भित्रको विषयबस्तुलाई बाहिर ल्याउनुभयो त्यसमा हाम्रो ध्यानाकर्षण भएको हो ।’ उनले आफुहरुले जबरजस्ती ढंगबाट निर्वाचनको समय सार्नु र पार्टीहितलाई मध्यनजर गरेर चुनावबाट पछाडी हट्ने दुई वटा विकल्प मध्ये आफहरुले दोस्रो विकल्प छानेको बताए । उनले आफुहरुले पार्टीहितलाई मध्यनजर गर्दै चुनावबाट पछाडी हट्दा आफुहरुका विरुद्ध विभिन्न भ्रमहरु फैलाइएको बताए । उनले आवश्यक १४ जनाका लागि ३० जना उम्मेदवार मध्ये १६ जनाले लिखित रुपमा निर्वाचन प्रकृयाबाट पछाडी हट्दा समेत चुनावको नाटक गरेर एउटा पक्षको एजेन्ट समेत बस्न नदिएर चुनावको मञ्चन गरेको उनले बताए । उनले ५० जना सहभागी भएर एक जनाले १०÷१० वटा भोट हालेको समेत बताए ।

पत्रकार सम्मेलनमा बोल्दै सुदूरपश्चिमका पुर्वसामाजिक विकासमन्त्री कृष्णराज सुवेदीले आफुहरुले पत्रकार सामु उपस्थित हुन नचाहेपनि इतर पक्षको व्यवहारका कारण बाध्य भएर आउनुपरेको बताए । उनले सर्वसम्मत रुपमा पार्टीको प्रतिनिधि सर्वसम्मत रुपमा चयन गर्नुपर्ने भन्दै आफुहरु पछाडी सरेकोमा आफुहरु पछाडी सर्नुका पछाडी अनेक भ्रमहरु सृजना गरिएको बताए । ‘हामीले सबैको चाहना बमोजिम सर्वसम्मत रुपमा प्रतिनिधि चयन गर्ने अपेक्षा राखेका थियौ, त्यसरी छनौट नभएर सर्वमान्य विधिलाई स्विकार गरेर जानुपर्छ भन्दै निर्वाचनका लागि ३२ जनाले उम्मेदवारी दियौ’ उनले भने ‘चुनावको अघिल्लो दिनसम्म सहमतीका लागि जिल्लाबाट आएको टोलीसँग छलफल चलिरहेको थियो, तर निर्वाचन कमिटिले साढे ४ बजे उम्मेदवारी फिर्ता लिने भनेपनि ६ बजेसम्म सबै सहमतीका लागि छलफल गरिरहेकाले त्यो सम्भव भएन ।’

उनले पार्टी भित्रैका केही व्यक्तिका उम्मेदवारी ७ बजेसम्म फिर्ता भएपनि आफुहरुको समुहबाट गएका व्यक्तिको उम्मेदवारी फिर्ता नगरिएको बताए । उनले निर्वाचनका लागि तोकेको समय अगावै देखी निर्वाचनको प्रकृया थालिएपछि १४ जनालाई सर्वसम्मत दिने गरी बाँकी १६ जना उम्मेदवार पछाडी हटेको बताए । उनले चुनाव हार्ने डरले चुनावी प्रकृयाबाट पहाडी हटेको भन्ने भ्रमपुर्ण कुरा इतर पक्षले फैलाएको बताए ।

‘दलित कलस्टरको अलग गरेर करिब १ हजार ४ सय बढी जनाले निर्वाचनमा भोट हाल्न पाउथे’ उनले भने ‘चुनावमा ५७७ भोट मात्रै खसेका छन, बाँकी ८ सय बढी भोटहरु कहाँ गए ?’ ति सबै भोटहरु आफुहरुले चुनावी प्रकृयामा भाग नलिएकाले नआएको उनले दावी गरे । अवैधानिक निर्वाचन भएकाले आफुहरुले निर्वाचनको मतपरिणाम नमान्ने उनले बताए । उनले आफुहरुले जिल्ला र प्रदेश कमिटिमा पनि निवेदन दिईसकेकाले त्यताबाट आएको अन्तिम सत्यलाई मात्रै स्विकार्ने बताए । एमालेको सुदुरपश्चिम प्रदेश अधिवेशन यही असोज २१ र २२ गते कैलालीको धनगढीमा हुदैछ ।